Maitataas sa mas malawak na proteksyon sa pagkalugi an mga paraoma asin parasira makalihis na aprobaran kan House of Representatives sa third and final reading an panukalang batas na mapakusog sa Philippine Crop Insurance Corp. (PCIC).
Sa irarom kan House Bill No. 10365, bako na sanang paroy asin mais an pwedeng sakopon kan crop insurance kundi pati na man an mga high-value crops, livestock, aquaculture asin fishery products, agroforestry crops, asin forest plantations.
Puwede man na isabay sa insurance an mga makinarya, kagamitan, transport facilities, asin iba pang agricultural infrastructure, siring man an life asin accident term insurance para sa mga paraoma asin parasira.
Obheto kan panukala na mas mabilis na makabangon an mga benipisyaryo gikan sa epekto kan bagyo, iba pang kalamidad, helang kan pananom asin hayop, pati na ang peste asin iba pang pagkalugi.
Sigon ki House Speaker Faustino “Bojie” Dy III, mahalaga an mas matibay na insurance system tanganing dai mapaduman sa pagkakautang an mga paraoma sa lambang tatamaan nin kalamidad an saindang kabuhayan.
Sa panukala, pwede man na magpatupad an PCIC nin parametric o index-based insurance asin iba pang makabagong insurance products, habang pigmamantener an government premium subsidies para sa mga kwalipikadong subsistence farmers na nagooma nin dai masobra sa tolong (3) ektarya.
