NAGA CITY- Padagos an monitoring sa lado kan Camarines Sur Police Provincial Office sa papaabuton na bagyo na piglalaomang malaog sa Philippine Area of Responsibility.
Sa entrevista kan Bombo Radyo Naga ki PCPT Liza Jane Alteza, tagapagtaram kan Camarines Sur Police Provincial Office, sinaysay kaini na pirmeng preparado an saindang lado sa mga siring na klase kan kalamidad orog na ta numero unong mandato kan saindang kabuhan iyo an pagbantay asin pagsierto sa kasalbaduhan kan publiko.
Katakod kaini, liwat na pig-enkaminar kan opisyal an publiko na magpreparar kan saindang mga Go Bag, pasiguraduhon an mga importanteng dokumentos, mga ready to eat na pagkakan, panribay na bado asin iba pa.
Siringman sa mga nasa low lying areas, pirmeng magmonitor sa kamugtakan kan panahon orog sa lebel kan tubig sa saindang areas siringman magsunod sa abiso kan saindang kanya-kanyang lokal na gobierno enkaso magpautob nin force evacuation.
Importante soboot ini tanganing malikayan an mga untowards incident mantang tuyong igwang kalamidad.
Mientarastanto, pigsaysay man kan opisyal na posible soboot magpadara nin kapulisan gikan sa Bicol Region pasiring sa mga lugar na naapektaran sa panlalamasa ni Bagyong Tino.
Sa ngunyan, hagad na sana kaini an kooperasyon kan publiko sa panahon kan kalamidad tanganing malikayan na mabugtak sa anuman na katibaadan.
