NAGA CITY- Nakapreparar na an lambang hepatura sa siyudad nin Naga siringman sa probinsya nin Camarines Sur para sa pagpupuon kan Simbang Gabi.
Sa entrevista kan Bombo Radyo Naga ki PCPT. Liza Jane Alteza, PIO kan Camarines Sur Police Provincial Office, sinaysay kaini na nakapreparar na an saindang hepatura para sa deployment kan saindang mga kapulisan para saagang mag-oomagahon kun saen mapuon an enot na aldaw kan Simbang Gabi.
Sigun ki Alteza, mayo man nin eksaktong numero na itatao an saindang opisina sa kada station para magbantay sa mga simbahan nin huli ta 90% kan saindang personnel an nasa luwas nin mag-oomagahon kun saen bako sanang sa simbahan nakatalaga an saindang pagbabantay alagad magin man sa mga national highways tanganing mamantinir an marhay na daloy kan trapiko, siringman sa iba pang mga lugar siringkan merkado asin plaza na dakol man nin mga tawo mantang ginigibo an misa.
Mientrastanto, sigun man soboot sa saindang Provincial Director, ipinagsugo na kaini na maski an natatadang 10% sa mga police station an deployable paman kabali na an saindang hepe. Obheto kaini na mabantayan an gabos na tawong masimba, mapasiring sa merkado asin kun ano paman an gigibuhon saaga.
Apwera pa digdi, babantayan man kan saindang lado an mga tawong igwa nin maraot na intensyon tuyong igwa nin kasiributan.
Katakod kaini, mayo man nin mga nakaleave na pulisya sa entirong holiday season tanganing magin full force an saindang hepatura.
Sa ngunyan, liwat na sanang nagpagirumdom an opisyal sa mga Church goers na likayan an pagdadara asin pagsulot nin mga mamahalon na gamit, dae man soboot magpasiring sa mga bakong salbadong lugar asin dae magsolo sa paglakaw.
