NAGA CITY- Ma-deploy an Camarines Sur Police Provincial Office nin saindang personnel sa manlaen-laen na sementeryo, pampublikong lugar, highways, places of convergence para sa papaabuton na Undas 2025.
Sa entrevista kan Bombo Radyo Naga ki PCPT. Liza Jane Alteza, tagapagtaram kan Camarines Sur Police Provincial Office, sinaysay kaini na puspusan an preparasyon na saindang ginigibo tanganing maasegurar an kasalbaduhan kan publiko sa pag-obserbar kan Undas.
Katakod kaini, liwat na nagpagirumdom an opisyal dapit sa mga bawal darahon sa sementeryo siring kan matatarom na bagay, arak, loudspeaker o pag videoke asin iba pa.
Sigun sa opisyal, sa mga malinig sa puntod kan saindang kaparientes na enot naman nagtalikod sa kinaban mas marhay na gibuhon na ini ngunyan orog na ta bawal na an maglaog nin mga matatarom na bagay sa Nobyembre 1 hasta 2.
Apwera digde, pasiguraduhon soboot an mga mawawalat sa harong, ikandado asin siertuhon na dae mahahabon orog na ta sa panahon na ini nagluluwas an mga kawatan na pigsasamantala an nasambitan ng kasiributan.
Siringman sa mga may darang aki sa laog kan sementeryo pirme dapat na naka-alerto tanganing malikayan na magkawararaan partikular ta dagsa an mga tawo sa mismong aldaw kan Undas.
Mientrastanto, nagtitinir na normal pa man an bulos kan trapiko sa presente alagad yaon naman an presensiya kan kapulisan na preparadong mag-assist sa mga mangangaipuhan na mga motorista o biyaheros.
Sa ngunyan, pig-abisuhan na sana ni Alteza an publiko na tolos na mag-apod sa 911 kun enkaso kaipuhanin nin tabang gikan sa mga kapulisan.
