Orog na pinakusog pa kan Department of Agriculture (DA) asin man Food and Drug Administration (FD) an saindang pwersa para sa regulasyon asin man pag-rollout kan mga bakuna para sa Avian Influenza asin African Swine Fever.
Sa katunayan, sinaysay man DA na an mga opisyal kan attached agency kaini na Bureau of Animal Industry (BAI) asin FDA ay nag ulay kan nakalihis man na Mayo 19 kun saen pinag-ulayan digde an updates sa ASF asin AI vaccine candidates komo parte kan direktiba ni Presidente Ferdinand Marcos Jr. na protehiran an sektor kan urig asin manok na importante para sa food security asin pagkriar nin trabaho.
An miting ay inatendiran ni Agriculture Undersecretary for Livestock Dr. Constante Palabrica asin bagong itinalagang FDA Director General Atty. Paolo Teston.
Parehas nagpahayag an mga nasambitan ng ahensya nin kumpiyansa para sa posibleng commercial rollout kan ASF asin AI vaccines posible antes man matapos an taong 2025.
Nagkapira sa mag bakuna nagsasairarom sa presente nin field trials, mantang an iba ay pig rerebyu kan BAI Veterinary Technical Advisory Committee (VTAC).
An nagkapirang vaccine candidates haloy nang pig endorso sa FDA para sa padagos na ebalwasyon approval.
Pormal na man na ire-refer kan BAI an mga aplikante sa FDA, tangani sa siring kaini ay makapagtao nin regulatory feedback asin man giya sa mga kinauukulang lakdang.
Matao man an National African Swine Fever Prevention and Control Program kan BAI nin updates sa pag-rollout kan Live Attenuated ASF vaccine, kabali na digde an data na ginagamit.
An pagpapakusog kan koordinasyon sa pag ultanan kan DA asin FDA an susi sa pag asegurar kan napapanahon asin epektibong vaccine approval.
Makakatabang ini tangani mamantinir an salud kan mga hayop asin man suporta sa resilience kan livestock asin poultry industries mantang pinag pepreparar an commercial use kan nasambitan ng bakuna.
Kinakaipuhan man kaya na magarantiya an salbado asin episyenteng implementasyon.
Sinisimbagan kan miting an mga agrangay manungod illegal online sales kan unregistered vaccines, susog pa sa Agriculture Department.
Siringman, nilinaw kan FDA, na an pagpapautob ay bumagsak sa irarom man kan Department of Information and Communications Technology (DICT).
Tangani pag ulayan ini, nagpunakala an ahensya nin joint policy asin implementasyon nin framework kabali na an DA, FDA, DICT, asin Department of Trade and Industry (DTI).
