NAGA CITY- Pigsierto kan Department of Agriculture-Bicol na padagos na mababa an presyuhan kan bagas katakod kan paparaning aranihan.
Sa entrevista kan Bombo Radyo Naga ki Lovella Guarin, tagapagtaram kan Department of Agriculture-Bicol, sinaysay kaini na ngunyan na papaabutong anihan, piglalaoman na mababa an presyuhan kan bagas sa nasyon nin huli ta igwa bastanteng suplay kaini.
Apwera digde, maabot naman soboot an mga imported na bagas gikan sa ibang nasyon na makakadugang sa suplay kan bagas na magreresulta tanganing magkaigwa nin balanseng presyuhan kaini sa mga merkado publiko.
Marurumduman, padagos an pag-agrangay kan mga namamanwaang Pilipino huli sa halangkaw na presyuhan kan bagas na padagos na nag-iiral sa nasyon. Kun kaya an pinaglalaoman na pagbaba kaini an makakatabang nin dakula tanganing mabawasan an pagsakit na kinakahampang kan mga nagteteos na pamilya.
Sa ibong na lado, maogman man na pigreport ni Guarin na halangkaw an presyuhan kan mga paroy sa presente na marhay man na bareta para sa mga paraoma partikularmente sa mga paraoma na yaon sa Bicol Region na mapakol sa nasa 700-K farmers.
Sa ngunyan, pig-enkaminar na sana kan opisyal na gabos na magpasiring sa mga regular na Kadiwa Center sa Bicol Region kun mawot soboot na makabakal nin baratong bagas.
