NAGA CITY- Namataan soboot kan nagkapirang mga residente sa Balabac Islands an duwang Chinese warship na naglalawod sa katubigang sakop kan isla.
An Balabac Island an makukua sa katimugang parte kan Palawan kun saen mahihiling man an saro sa mga Philippine bases na nakatalaan na gamiton kan US Forces sa irarom kan Enhanced Defense Cooperation Agreement (EDCA).
Sarong dating kapitan kan barangay na binistong si Roy Reyes an nagkua kan video mantang naglalawod an mga barkong pandigma.
Sigun sa dating Brgy official, nakalunad ini sa saiyang sadit na bangka kan mahiling kaini an mga barko, asin an deriksyon an katubigan kan Mangsee asin Onok Islands, mga islang parte kan Balabac.
Dugang pa ni Reyes, bako naman bago sa mga residente kan Balabac na makahiling nin mga darakulang barko na nag-aagi sa lugar orog na agihan ini kan mga international cargo vessel.
Alagad ini man soboot an enot na pagkakataon na makahiling an mga residente nin barkong pandigma kan mga Tsino na naglaog na labing harani sa teritoryo kan Pilipinas.
An Balabac an igwang rayong 140 nautical miles gikan sa Mischief reef na dati naman na pigpatindugan kan mga Chinese kan nagkapirang mga istraktura.
