NAGA CITY- Maabot sa labi sa 1,000 na paraoma asin labi sa 1,000 na ektarya nin umahan an nadanyaran huli sa epekto kan bagyong Urduja sa Bicol Region.
Ini an kinumpirmar ni Emy Bordado, tagapagtaram kan Department of Agriculture (DA) Bicol sa entrevista kan Bombo Radyo Naga.
Sigon ki Bordado, sa ibong kan dae direktang pagtama kan bagyo sa rehiyon, nairehistro pa nanggad suboot an dakulang danyos sa sektor nin agrikultura sa manlaen laeng probinsya kun saen nairehistro sa Masbate an nasa 618 apektadong paraoma, 647 sa Camarines Sur asin 17 sa Sorsogon.
Apwera digdi, maabot man sa kabilugang 1,413.5 ektarya nin umahan an nadanyaran.
Nilalaoman man kan DA-Bikol na malobo pa an numero kan mga apektadong paraoma sa rehiyon urog pa ta padagos pa nindang pighahalat an mga report hale sa iba pang probinsya arog kan Albay, Catanduanes asin Camarines Norte.
Mientrastanto, nakaandam man suboot sindang magtao nin maninigong tabang sa mga paraoma na labing naapektaran kan nasambitang kalamidad.
