Sinabi kan apat na dating bodyguards ni dating Ako Bicol party-list Rep. Elizaldy “Zaldy” Co na binuo an ”18 Maleta boys” tanganing mang-blackmail asin mangikil kontra sa pirang bistadong pulitiko asin haralangkaw na opisyal katakod kan pagdedeliver nin male-maletang may kwarta.
Magigirumduman na binawi kan apat sa 18 miyembro kan dating bodyguard ni Co an saindang mga nainot na akusasyon kina Pangulong Ferdinand Marcos Jr., Leyte Rep. Martin Romualdez, asin Co makalihis suboot nindang maaraman na an obheto kan saidang grupo an”mang-blackmail asin extortion” kontra sa pirang mga personalidad.
Sa saindang bagong sinumpaang salaysay sinabi nindang habang naghahaloy ay paburo-bago na suboot an mga pangaran kan mga personalidad na idinadawit sa mga alegasyon.
Saro pang dating bodyguard an nagsabi na ogheto suboot na paluwasong nag reresebi nin kwarta hali kay Co an mga personalidad na saindang idinawit.
Inakusahan man ninda an saindang abogado na si Atty. Levito Baligod na nagtuga suboot kan dakulang kantidad nin pera kun magpapanyari an sinasabing plano.
Mariin man tig ninigar ni Baligod an mga pag akusa. Suboot, mayong katotohanan an mga alegasyong may pangingikil kontra sa mga pulitiko.
Inapod niya ining “harayong-harayo sa katotohanan.”
Tignigar man kan abogado na nagtuga suboot siya nin dakulang kwarta karibay kan pagpirma nin mga affidavit kan mga ito.
Segun kay Baligod, an sinambit lang niya sa grupo ay bukas sinda makipagtabangan kun may problema an saindang mga pamilya, asin bako an pagtatao ng dakulang kantidad nin kwarta.
Mientrastanto, nanindugan si George Villalon, saro sa mga dating bodyguard na dae umatras sa saiyang salaysay, na totoo an saindang mga nainot na alegasyon.
Ininsiter niya na an apat na testigong bumawi sa saindang mga affidavit na inalok suboot nin P20 million hasta P25 million kada saro karibay kan pagbawi kan saindang mga testimonya.
Sinabi man niyang inalok man siya nin kwarta alagad tig sayumahan niya ini.
Padagos na nakikipag-ugnayan an Bombo Radyo para kuhon an reaksyon kan pirang personalidad na isinangkot kan ”Maleta boys.”
