Pigbunyag ni Department of the Interior and Local Government o DILG Sec. Benhur Abalos Jr., asin PNP Chief Rommel Franciso Marbil na patong-patong na asunto an saindang naresiber sa pagpupursigeng masakote si Kingdom of Jesus Christ (KOJC) Founder Apollo Quiboloy.
Sa press conference sa Camp Crame, sinaysay kaining pig kinasuhan ini kan administrative case kan mga kasapi kan KOJC sa Davao RTC siringman nin violation of domicile, interruption of religious worship, offending the religious feelings, grave threat asin conduct unbecoming of a public officer.
Apwera pa digdi, nagsunad man si dating Presidente Rodrigo Duterte nin 2 counts kan malicious mischief kina Abalos, Gen. Marbil asin pira pang police officials.
Napag-araman na si Duterte an bagong administrator kan KOJC properties kun saen an malicious mischief an pig-sangat kun igwa nin destruction o pagkaraot kan mga pagsadiri. Duwang kaso nin malicious mischief an isinangat sa Davao RTC Branch 15.
Marurumdoman, pighaluglog kan mga otoridad an nasa 30 ektaryang compound kan KOJC sa Davao City kun saen naglaog sinda nin mga makabagong kagamitan siring kan life asin motion tracer, life detector equipment asin proton elicit device na posibleng makapag-detect nin vital signs kan sarong tao tanganing mahanap an puganteng pastor. Sigon ki Abalos, parte ini kan saindang trabaho asin hahampangon an sana kaini an mga kaso sa korte.
