Mahampang sa saiyang enot na paglilitis sa kasong insurrection o panunulsol sa pag-aaklas an dating Presidente kan South Korea na si Yoon Suk Yeol ngunyan na Lunes, Abril 14, katakod kan saiyanng bigong pagporbar na magdeklara nin martial law kan Disyembre 2024.
Napag-araman na kan Disyembre 3, pigsugo ni Yoon an pagsuspinder kan mga aktibidad sa pulitika asin an pag-implementar kan media censorship, na naghaloy sana nin anom na oras antes ini binaliktad kan oposisyon sa National Assembly.
Huli kaini, tulos ining pig-impeach asin kan Abril 4, dagusang pinatalsik kan Constitutional Court sa puwesto si Yoon.
Naarestar man si Yoon kan Enero makalihis na magsayuma na masuko sa mga otoridad sa laog nin pirang semana. Ini an pinakaenot na presidente kan South Korea na inarestar mantang yaon sa pwesto.
Pinaluwas ini makalihis nin 52 aldaw, matapos na kwestyunon kan korte an legalidad kan saiyang pagkakakulong.
Sa saiyang pagbalik sa pribadong buhay kan Abril 11, si Yoon nagpaaram sa publiko asin nag-anunsyar na ini an makakahanap nin bagong dalan tanganing magserbisyo giraray sa gobyerno.
Kun mapatotoohan, si Yoon an pwedeng makulong nin buhay o sa penalidad na kagadanan. Huli kan saiyang paghale sa pwesto, sarong snap election an gigibuhon sa Hunyo 3 ngunyan na taon para sa bagong presidente kan South Korea.
Sa presente, an nasyon pinamamayohan ni Acting President Han Duck-soo.
