Target kan Department of Budget and Management (DBM) na magkaigwa nin unified master plan para sa pangmahaluyang solusyon sa pauru-utro na problema nin pagbaha sa nasyon.
Ini man an kasunod kan mahewasang pagbaha na nagresulta sa pagka-displace kan milyong mga Pilipino kan nakalihis man na bulan nin Hulyo dara kan magkakasunod na tumamang kalamidad.
Sigun ki Budget Secretary Amenah Pangandaman, sarong mayor na prayoridad kan administrasyon ni Presidente Ferdinand Marcos Jr. an flood control. Kaya man kaipuhan soboot nin consolidated plan orog na sa Metro Manila, kun saen makikipagtabangan sa mga lokal na gobyerno na igwa nin kakayahang pondohan an mga proyekto.
Nagkapira sa mawot ipasumiter kan DBM iyo an sarong menu o listahan kan mga posibleng solusyon huli ta bako man soboot sasaro sana an epektibong paagi para sa gabos nin lugar.
Kaiba sa plano an pagtutugdok nin dam sa Marikina River, proteksyon sa baybayon kan Laguna de Bay, modernisasyon kan pumping stations, asin man pagpaparahay kan amay na patanid asin koordinasyon kan mga ahensya.
Parte kan proyekto an pag-upgrade nin 36 na lumang pumping stations, pagtugdok nin 20 dugang na pumping stations, asin iba pang imprastraktura sa pangenot na pigbubulusan kan tubig tangani malikyan an pagbaha.
