NAGA CITY- Rinibo nang mga deboto an padagos na nagbubulos sa kapilya kan Amang Hinulid sa barangay Sta Salud sa banwaan nin Calabanga, Camarines Sur kasabay kan ikokondusir na alay-lakad ngonyan na aldaw.
Katakod kaini, amay man na nagpasiring sa nasambitang lugar an pamiya kan deboto na si Arlita Celso, tubong Tinambac, Camarines Sur asin presenteng nakaistar sa Biñan, Laguna para makahadok sa Imahe.
Sa entrevista kan Bombo Radyo Naga ki Celso, sinaysay kaini na high school student pa sana siya kan magpuon an saiyang debosyon sa Amang Hinulid.
Labi man an pasasalamat ni Celso huli sa saiyang debosyon sa Imahe, nagkahilingan sinda kan saiyang ama makalihis an 14 taon matapos na iwalat sinda kaini kan 4-anyos pa sana siya.
Sigon pa ki Celso, pig-iba niya an saiyang pamilya sa pagbisita niya ngonyan na taon sa banwaan nin Calabanga para maeksperyensyahan man kan mga ini an saiyang panata sa Amang Hinulid.
Mientrastanto, padagos pa man an pagbulos kan mga deboto na nakikisumaro sa taunang alay-lakad pasiring sa nasambitang bayan kun saen nagpupuon an prusisyon sa ciudad nin Naga.
