Naglunsar an Department of Trade and Industry (DTI) kan Youth Enterprise Fund tanganing matabangan an mga jovenes na may edad 18 sagkod 30 na makapuon nin sadiring negosyo.
An kwalipikadong mga aplikante pwedeng mangutang sa pag-oltanan nin ₱30,000 sagkod ₱500,000, na babayadan sa laog nin sagkod sa tolong taon. Pwede man sindang magkaigwa nin sagkod sa 12 bulan na grasya bago sinda magpoon na magbayad.
Segun ki Trade Secretary Cristina Roque, katuyuhan kan programa na mahale an mga financial barriers ngani na mareyalisar kan mga jovenes an saindang mga ideya sa negosyo asin makamukna nin mas dakul na trabaho sa saindang mga komunidad.
Pinasimple man kan DTI an proseso kan aplikasyon. An kaipuhan sana iyo an sarong balidong ID, permiso nin alkalde, account sa bangko, plano sa negosyo, asin mga dokumento sa rehistrasyon nin negosyo. An mga aplikasyon mapoon sa Hulyo 27.
Apwera sa mga pautang, pinapakusog man kan DTI an mga micro, small, asin medium enterprises (MSMEs) sa paagi kan iba pang mga programa na makakatabang sainda na mapauswag an saindang mga negosyo, makalaog sa global market, asin mapalangkaw an saindang competitiveness.
