Hinahalat pa kan Department of Education (DepEd) Camarines Sur an opisyal na nakasurat na direktiba hali sa Central Office manungod sa ipinahayag na pagtugot sa mga estudyante na magsulot nin sando bilang simbag sa grabeng init kan panahon.
Sa intrevista kan Bombo Radyo Naga ki Atty. Salvador Bogs Pelingon, Division Information Officer kan DEPED-Camarines Sur, sinaysay niya na mayo pa sindang nareresibeng pinal na tagubilin hali sa opisina kan kalihim manungod sa pagpautob kan nasabing polisiya.
Segun ki Pelingon, importante na malinaw an magigin panuntunan tanganing masiguro na maipautob ini nin tama kan mga eskwelahan, orog na sa mga lugar na nakakaeksperyensya nin grabeng init mantang piglalaoman an epekto kan El Niño phenomenon.
Sinabi pa niya na haloy nang nag-eeksister an polisiya kan DepEd na bakong sapilitan an pagsulot nin uniporme sa mga estudyante kan mga pampublikong eskwelahan. Siring man, piglalaoman pa man giraray an pagsulot nin disente asin angkop na bado sa laog kan eskwelahan.
Posible man suboot kaiba sa mga pag-aadalan sa bagong direktiba an klase nin sando na pwedeng suloton kan mga estudyante, tanganing masiguro na magdadanay na angkop an saindang kasulotan, partikular sa mga estudyante sa junior asin senior high school.
Mientrastanto, nananatiling problema an kakulangon nin maayos na bentilasyon sa nagkapirang eskwelahan, na lalo sa padagos na pagdakul kan bilang nin mga estudyante na naggagamit sa mga pasilidad na bakong orihinal na dinisenyo para sa dakulang populasyon nin mga mag-aadal.
Dugang pa kaini nagkapirang eskwelahan na umanong naggigibo nin mga lakdang tanganing mapakarhay an kondisyon kan mga eskwelahan, kaiba an pagkaag nin air-conditioning units. Minsan siring, hamon pa man giraray an halangkaw na konsumo sa kuryente.
Bilang alternatibong lakdang sa grabeng init, pwedeng ikonsiderar man an pagbalyo sa modular learning hali sa face-to-face classes, uyon sa nag-eeksister na mga patakaran asin maninigong pag-asesar sa kondisyon kan panahon.
Huli kaini, tigenkaminar niya an mga magurang asin kawani kan eskwelahan na padagos na ikonsiderar an kaligtasan asin kapakanan kan mga estudyante, mantang pigpapahalat an pinal na direktiba kan DepEd.
Tinawan-duon kaini na dawa importante na matugunan an epekto kan grabeng init, dapat pa man giraray na mapagdanay an disente asin angkop an kasulotan kan mga estudyante, uyon sa nag-eeksister na mga panundunan asin kultura kan lambang eskwelahan.
