NAGA CITY- Pig-enkaminar kan Department of Education Camarines Sur an mga paratukdo na dae magretiro nin nasa Teacher 1 position.
Sa entrevista kan Bombo Radyo Naga ki Atty. Salvador Bogs Pelingon, Division Information Officer kan DepEd-Camarines Sur, sinaysay kaini na kaipuhan an mga partukdo dae nag-uuntok sa pag-aadal nin huli ta saro soboot ining continous process.
Sigun sa opisyal, mantang pigpapadangat an posisyon kaipuhan na isipon man an promotion. Katakod digde, kaipuhan an sarong paratukdo an igwang edge sa iba, kaipuhan na nag-aadal nin masters asin doctors degree.
Apwera digde, dapat igwa man trainings asin seminars na pig-atenderan komo dugang na dokumentos sa pagpapapromote.
Paliwang pa ni Pelingon, sa paagi kan mga trainings nagkakaigwa nin bagong impormasyon an mga paratukdo sa pagtutukdo o mga learning materials na dakulang tabang para sa mas marhay na kalidad kan edukasyon.
Pigsaysay pa kan opisyal na bako naman magabat an pagpapapromote sa presente nin huli ta mas madali na an proseso kaipuhan sanang maabot kan mga paratukdo an hinahagad na requirements.
Mientrastanto, nagtitinir man na kulang an mga paratukdo sa dibisyon na padagos na pigreresolbaran kan pamayuhan sa presente.
Sa ngunyan, pigsierto na sana ni Pelingon na padagos an saindang ginigibong programa para sa ikakarahay kan mga estudyante asin paratukdo.
