Pigkokonsederar kan sarong opisyal kan Department of Education Camarines Sur komo welcoming development an nagin laog kan SONA ni Presidente Ferdinand Bongbong Marcos Jr orog na an para sa mga programa sa lado kan edukasyon.
Sa entrevista kan Bombo Radyo Naga ki Atty. Salvador Bogs Pelingon, Division Information Officer kan DepEd Camarines Sur, sinaysay kaini na naoogma soboot sinda na igwang mga lakdang an gobierno tanganing masimbagan an dapit sa learning outcomes sa basic education.
Sigun ki Pelingon, marhay soboot an aspeto na igwang positibong punto de vista an Presidente sa mga dapat na gibuhon asin paduman kan Department of Education.
Katakod digde, naglalaom man an opisyal na susuportaran kan mga lehislador sa paagi kan pagkriar nin magkakanigong ley an programa kan Presidente tanganing ma-implementar nin marhay.
Mientrastanto, pig-ako man kan DepEd na igwang problema pag-abot sa numero kan mga estudyante na dae tatao magbasa asin magbilang huli sa epekto kan nakalihis na pandemya asin manlaen-laen pa na factors.
Importante soboot kaya ini nin huli ta ini an nagigin basehan tanganing mas maintindihan kan mga estudyante an halangkaw na antas kan literacy.
Pigtawan duon pa kan opisyal na masasakitan an mga kaakian na mag-intindi kun dae tatao magbasa.
Huli digde, kaipuhan nin komprehensibong lakdang tanganing masimbagan an nasambitan ng problema.
Sa ngunyan, hagad na sana kaini na magtarabangan an gabos sa pangengenot kan Presidente na pauswagon an sektor kan edukasyon sa bilog na Pilipinas.
