NAGA CITY- Regular na nagsasagibo nin School-Based Feeding Program an Department of Education Iriga para sa mga kaakian na sakop kan programa.
Sa entrevista kan Bombo Radyo Naga ki Noel Panga, Principal I asin Division Information Officer kan DepEd-Iriga, sinaysay kaini na sa presente igwang 4,052 na benipisyaryo kan nasambitan ng programa sa saindang dibisyon.
Obheto kan School-Based Feeding Program (SBFP) na magtao nin masustansyang pagkakan para sa mga jovenes na nagsasapo nin ‘severe malnutrition,’ kaibahan an mga gikan sa indigenous groups, indigent families, asin severely stunted na mga aki.
Kaibahan soboot sa menu kan SBFP an mga pagkakang mayaman sa nutrisyon siring kan Nutribun, Nutri Cookies, Nutri Crackers, asin iron-fortified rice (IFR).
Apwera digde, pigpepreparar man an mga hot meals sa mga eskwelahan tanganing masierto an sariwa asin balanseng pagkakan para sa mga estudyante.
Dugang pa kan opisyal na obheto pa kan programa na mapamarhay an salud kan mga estudyante,attendance asin pagkanood susog sa nag-iiral na ley na ‘Masustansyang Pagkain para sa Batang Pilipino Act o RA 11037.
Sa ngunyan, pigsaysay kan opisyal na marhay man an programa asin kadakol an natatabangan na mga kaakian.
