Mas papapusugon pa kan Department of Education (DepEd) an pakikipagtabangan sa mga simbahan asin civil society groups tanganing maabot an mga aking dae naaabot kan edukasyon.
Pigtawan-duon ni Education Secretary Sonny Angara, sa saiyang nagin patara-tara sa 42nd National Social Action General Assembly kan Caritas Philippines, an importanteng papel kan nga community asin Church-based organization sa pagbubusol kan edukasyon.
Kaibahan na digde an pagpapautob kan mga programang siring kan school-based feeding, learning recovery, asin Alternative Learning System (ALS), orog na para sa mga out-of-school youth asin iba pang marginalized learners.
Pigheras man kan Sekretaryo an pagpapahewas kan School-based Feeding Program asin kan Academic Recovery and Accessible Learning (ARAL) Program tanganing masimbagan an problema sa gutom asin learning gaps kan mga estudyante.
Sigun ki Angara, importante an suporta kan mga lokal na komunidad asin volunteers tanganing magin epektibo an mga repormang ini sa edukasyon.
Pig-omaw man kan Sekretaryo an kontribusyon kan Caritas Philippines asin iba pang faith-based institutions, kaibahan an mga Jesuit schools, sa pagbubusol kan inklusibo asin makatawong reporma sa edukasyon na nakatuon sa kapakanan kan mga estudyante asin paratukdo.
