Plano kan Department of Education na gibuhong simple an curriculum para sa mga estudyante sa Senior High School.
Pigsaysay ni Education Secretary Sonny Angara sa paagi kan lakdang na ini matatawan nin tyansa an mga estudyante na matutukan an saindang mga on-the-job training o work immersion.
Piggibo kan sekretaryo an nasambitan ng patara-tara sa pigkundusir na 2024 Regional Conference on Educational Planning in Asia.
Paliwanag ni Angara, tututukan kan saindang ahensiya na maipreparar an mga estudyante sa manlaen-laen na industriya.
Enkaso na mangyari ini, maabot sana sa lima hasta anom na subject an itatao sa mga estudyante sa Senior High School.
Pigpaparepaso man kan sekretaryo an mga programa kan DepEd orog na an English, Science, asin Math sa presenteng curriculum.
Mientrastanto, mayo pang eksaktong panahon kun nuarin ini ipapautob kan Department of Education.
