Bakong bloodbath kundi bubble bath an hiling kan House prosecution panel sa Answer Ad Cautelam na isinumiter ni Vice President Sara Duterte sa Senate impeachment court komo kasimbagan sa mga alegasyon sa saiya.
Ini an inihayag ni House Impeachment Spokersperson Atty. Antonio Audie Bucoy. Sinaysay ni Bucoy na imbes na atubangon an magagabat na alegasyon, garu mas nakatutok an kampo ni Duterte sa pagpugol sa dagusang paglilitis.
Kan nakalihis na Biyernes, pigsunad kan prosekusyon an pormal na Reply sa Answer Ad Cautelam ni Duterte, na igwa soboot nin “misconceptions, falsehood asin general denial.”
Pigtawan duon ni Bucoy na bigong simbagan kan depensa an mga siguradong alegasyon nin katotohanan asin man imbes, nagtao nin pangkagabusang pagsayuma na mayong paliwanag.
Sa irarom kan ley, ipinaliwanag ni Bucoy na an siring na klase nin pagsayuma na mayong paliwanag an posibleng ikonsiderar na pag-amin.
Kabali sa seryosong alegasyong dae tinutulan kan kampo ni Duterte iyo an soboot salang paggasta kan P125 milyon sa confidential funds sa laog sana kan 11 aldaw, na na-flag sa audit findings.
Dugang pa kaini, dae man sinimbag ni Duterte an akusasyon kan prosekusyon na pigporbar kaining pugulan an pagluluwas nin mga dokumento kan Commission on Audit (CoA), kabali na an soboot pagpwersa sa CoA na dae pag isapubliko an nagkapirang records.
Pigtuyaw man ni Bucoy an kampo ni Duterte sa soboot pagporbar ilihis an urulay sa paagi nin mga procedural objections, siring kan forum-shopping asin jurisdictional claims, imbes na atubangon an mga aktwal na akusasyon.
Dae na dapat madistract an Senado komo Impeachment Court sa mga taktikang ini, asin pighurot na an tunay na urulay an kun nararapat pa bang magtinir si Duterte sa saiyang posisyon komo opisyal kan gobyerno.
Sa ibong kan mga pampublikong pahayag ni Duterte na hinahamon an mga nag-aakusar sa saiya na idagos an trial, sinaysay ni Bucoy na iba an ipinapahiling na hiro kan saiyang legal team.
