Pinaparikas na kan Bureau of Immigration (BI) an pagpapa-deport kan mga dayuhan na obrero kan Philippine Offshore Gaming Operator (POGO) na nadakop sa mahiwas na operasyon na ginibo kan mga awtoridad.
Segun ki BI Commissioner Joel Viado, kaipuhan na padalion an pagdeport kan mga nasambitan ng obrero asin padagos na maibalik sa kanya-kanyang lugar komo pagsunod sa polisiya ni Presidente Ferdinand Marcos Jr. na ipagbawal an gabos na operasyon kan POGO.
Kan Enero 2025, tulong Intsik an pig deport pabalik sa Xiamen, Tsina. Binisto sinda na si Lyu Xun, 23 anyos; Kong Xiangrui, 26 anyos; asin si Wang Shangle, 25 anyos.
Kabali an mga ini sa 450 na iligal na obrero kan POGO na nadakop sa ginibong operasyon sa Parañaque City kan Enero 8. Sigon ki Viado, enot pa sana ining batch kan mga deportado, paramientras na pigpaparikas man an deportation papers kan iba pang foreigner na nadakop huli sa pagbalgar kan immigration law kan nasyon.
Liwat man na nangapodan an commissioner sa mga dayuhan na ilegal na nagtitinir sa Pilipinas na magsuko na asin dae na maghalat na pwersahan na pahalion sa nasyon.
Apelar ni Viado na mas marhay na magkooperar an mga ini tangani na maibitaran an kasusupgan na dara kan pirit na deportasyon.
