NAGA CITY–Nagkirad ngunyan an kampo ni Camarines Sur 4th District Congressman Noli Fuentebella sa Memorandum Order No. 29 na nag-abolish sa Partido Development Administration (PDA).
Sa entrevista kan Bombo Radyo Naga ki Jerold Peña, Chief of Staff ni Fuentibella, sinaysay kaini na sarong sanang pamumulitika an desisyong i-abolish an nasambitan nang opisina.
Enot digdi, mismo an Sangguniang Panlalawigan kan Camarines Sur an may kamawotan na tunawon an PDA.
Pigtawan doon ni Peña na dae maninigong i-abolish kan sarong executive memorandum an PDA na naimukna sa paagi kan RA 7820 kan taon 1994.
Basado sa Memorandum, dae nautob kan PDA an mandato kaini sa laog nin duwang dekada urog na dae kaini nasolusyonan an poverty incidence sa ikaapat na distrito kan probinsya.
Sigun ki Peña, panggigipit sana ini kan provincial government na pinamamayuhan ni Gov. Migz Villafuerte na kalaban kan angkan kan mga Fuentebella.
An PDA an nagmamanehar kan Partido Water System na nagpapabulos nin suplay nin tubig sa rinibong mga residente sa nasambitan nang distrito.
