Pig-anunsiyar kan Department of Foreign Affairs (DFA) na epektibo ngunyan, January 16, 2026, pupwede nang makalaog nin Pilipinas sa laog nin 14 na aldaw ang Chinese nationals na dae kaipuhan magkua nin visa.
Obheto kaini na mapapusog an trade, investments, asin turismo, siringman an inaapod na people-to-people exchanges sa pag-ultanan kan Pilipinas asin China.
Sigun sa DFA, partikular na ngunyan an visa-free entry privilege sa Chinese nationals na papalaog nin Pilipinas para sa turismo asin business purposes.
Piglinaw man kan DFA na an visa-free privilege valid para sa entry sana sa Ninoy Aquino International Airport (NAIA) sa Metro Manila asin sa Mactan-Cebu International Airport (MCIA) in Cebu.
An kaipuhan sana gibuhon kan Chinese nationals magpahiling nin passport, kumpirmadong hotel accommodation/booking, asin return ticket pabalik kan saindang masunod na destinasyon na nasyon.
Pigsierto man kan DFA na mahigot na susurion kan Bureau of Immigration (BI) kun may derogatory records an biyaherong Tsino na malaog sa Pilipinas.
Mahaloy an visa-free entry arrangement sa laog nin sarong taon asin ire-review ini antes mapaso.
