Nakisumaro an Department of Human Settlements and Urban Development (DHSUD) sa whole-of-nation response tangani tabangan an mga nasalanta kan makusog na linog sa Cebu, katabang an iba pang ahensya kan gobyerno asin mga non-government organization (NGO).
Alinsunod ini sa direktiba ni Presidente Ferdinand R. Marcos Jr. para sa pagsasanib-pwersa kan mga ahensya kan gobyerno asin pribadong sektor sa pagtabang sa pagbangon kan lambang mga kababayang nabiktima kan linog sa Cebu, pahayag pa ni DHSUD Secretary Jose Ramon Aliling.
Kan nakalihis na Sabado, nag atendir an mga opisyal kan DHSUD sa interagency response meeting sa Bogo City, an sentro kan magnitude 6.9 na linog kan nakalihis na Setyembre 30.
Kabali sa mga nag atendir sinda Undersecretaries Ed Robles at Ramon Quintin Allado, asin Assistant Secretary Hernando Caraig Jr., kaiba si Philippine Red Cross chair Richard Gordon asin iba pang opisyal kan mga ahensya asin NGO tangani mapakusog an koordinasyon sa pagtabang sa mga biktima.
Sinuri man kan DHSUD officials an sarong residential area sa Purok Joseph, Barangay Dakit, na pinagtutubudang nasa ibabaw kan fault line na nagkawsa nin pagyugo-yugo.
Kaiba an mga eksperto gikan sa Philippine Institute of Volcanology and Seismology (Phivolcs), ininspeksyon man ninda an proposed “tent city” site na paramientras dadagusan kan mga residenteng nawaran nin harong o takot pang bumalik sa saindang mga istaran.
Kan nakalihis na Biyernes, ipinadara ni Aliling an DHSUD team sa Cebu tangani magsagibo nin ground assessment asin tukuyon an klase kan tabang na pwedeng itao sa mga naapektaran.
Pinagsugo man ni Aliling sa mga key shelter agencies kan DHSUD na suspindiron paramientras an housing amortization kan mga biktima kan linog asin kan mga nakalihis na bagyong Nando asin Opong sa Bicol asin Cebu, alinsunod sa kasuguan kan Presidente.
