NAGA CITY- Pigheras kan DICT-Camarines Sur an saindang dakulang papel na piggagampanan tanganing makalikay an publiko na mabiktima kan cybercrimes.
Sa entrevista kan Bombo Radyo Naga ki Maria Peñafrancia Nepomoceno, Provincial Officer, DICT Region V-Camarines Sur, sinaysay kaini na an saindang lado padagos an pagbilog nin mga lakdang tanganing malabanan an nagbubungkras na mga cybercrimes sa nasyon kasabay sa paglaganap man kan makabagong teknolohiya.
Sigun ki Nepomoceno, pigkriar an Data Privacy Act, Registration Law asin an pighahalat ninda na E-Government Law na makakatabang sa pagpuho o pagsimbag sa problema.
Katakod digde, huli sa mahewasang paggamit kan Artificial Intelligence o AI, liwat na inabisuhan kan opisyal an publiko orog na an mga Bikolano na maglikay sa mga nahihiling sa social media.
An iba kaya soboot digde an naggagamit nin lalawgon o boses kan mga sikat na tawo tanganing i-promoter an saindang mga produkto gamit na AI na obhetong mang-scam sana kan ibang tawo.
Apwera digde, yaon man an mandato na an kada Pilipino an obligadong i-register an saindang mga sim card tanganing mapugulan man an pagkuriyat kan text scams.
Huli ta boarderless na an teknolohiya sa presente, kaipuhan an mahigot asin pusog na protective measures siringman an pagregulate kan technologies tanganing malikayan an cybercrimes.
Sa ngunyan, pig-enkaminar na sana ni Nepomoceno an publiko na i-report sa NTC enkaso nabiktima kan scam o nakakareseber nin mga pekeng impormasyon.
