Piglunsar kan Department of Information and Communications Technology (DICT) an programang “Trabahong Digital” na igwa nin obhetong makakrear nin poco mas o menus walong milyong digital na trabaho pag-laog kan taong 2028.
Sigun ki Assistant Secretary Renato Paraiso, tagapagtaram kan ahensya, an paglulunsar kan pangenot na programang ini an sarong matapang na lakdang pasiring sa inklusibong pagbuhat kan ekonomiya asin digital na transformasyon sa irarom kan pamamayon kan bagong talagang sekrertaryo na si Henry Rhoel Aguda.
Piggibo an anunsyar sa pagbubukas kan National ICT Month ngunyan na taon na pigkundusir sa Basco, Batanes. Igwa nin temang “Walang Iwanan sa Digital Bayanihan,” kun saen pigtatawan duon kan pagselebrar an obheto kan ahensya na siertohong mayong Pilipinong mawawalat sa panahon kan digitalisasyon.
Obheto pa kan “digital jobs” na pahigoton an paggamit sa naghehewas na digital economy kan nasyon sa paagi kan pagpapahewas kan konektividad sa internet, orog na sa mga geographically isolated and disadvantaged areas (GIDAs), asin pagtatao nin bastanteng digital skills sa mga Pilipino tanganing sindad an makapaghanapbuhay.
Sa sarong mensaheng ipinaabot ni Sec. Aguda, na dae nakaatendir sa seremonya huli sa naento na mga obligasyon, tinawan-duon kaini an saiyang bisyon para sa sarong makabuluhan asin matatag na ICT sector.
Kabali sa mga pangenot na adbokasiya kan bagong pamunuan an pagpapakusog kan digital trust asin seguridad. Kabali digdi an pagpapatibay sa mga panundunan sa data privacy asin paninimbag kan mga digital platforms siring kan Meta sa pagtukoy asin pagtanggal kan mga pekeng job advertisements.
Parte kan mas mahewwas na lakdang tanganing proteheran an mga obrerong digital asin siertohon na lehitimo asin salbado an online job marketplace.
Katakad kaini, pigbubusol man kan DICT an modernisasyon kan serbisyo-publiko sa paagi kan mas marekas, mas simple, asin user-friendly na government e-services. Piglalaoman na magiging mas episyente asin abot-kaya an mga transaksyon sa gobierno, orog na para sa mga komunidad sa hararayong lugar.
