NAGA CITY- Nag-atendir si Vice President Leni Robredo sa sarong banal na misa na pigkondusir sa St. Jude Thaddeus Parish Church sa barangay Concepcion Grande, Naga City kasabay kan pagrumdom sa ika-32 taong anibersaryo kan Edsa People Power Revolution.
Sigon sa Bicolanang Bise Presidente, kasabay kan pagkomemorar sa People Power Revolution ngonyan na aldaw an pagrumdom man sa gabos na mga adal na nakua sa nasambitang pangyayari.
An aldaw na ini suboot sarong pagirumdom na an poder yaon sa kamot kan lambang Pinoy asin bako sana sa gobyerno.
Sigon pa ki Robredo, dapat an diwa kan pigkondusir na People Power Revolution, 32 taon na an nakakalihis dapat na isapuso aru-aldaw para dae na matugutan na mautro liwat an madiklom na parte sa historya kan nasyon.
Kinakaipuhan man suboot na labanan an siisay na nagpurbar na rauton an dignidad kan mga Pilipino.
Sa ciudad nin Naga mas pinili kan bise presidente na rumdumon an People Power para maipaabot na an pagselebrar kan nasambitang rebolusyon bakong nakasentro sana sa Metro Manila asin an laban suboot kan EDSA, laban man kan bilog na nasyon.
Mientrastanto, labi man an pasasalamat ni Vice President Robredo ki Archbishop Rolando Tria Tirona kan Arcdiocese of Caceres asin sa manhamiento kan St. Jude Thaddeus Parish Church sa pigkondusir na banal na misa digdi katakod kan pagrumdom sa People Power Revolution.
Napag-araman na mismong si Archbishop Tirona an nangenot sa pigkondusir na misa sa ciudad nin Naga asin inatendiran ini kan manlaen laeng opisyal kan ciudad asin si Camarines Sur third district Rep. Gabriel ‘Gabby’ Bordado.
