Dae pa maiimplementar an gobyerno kan mass repatriation sa tahaw kan nagdadakulang iriwal sa pagultanan kan Israel, Iran asin iba pang pagtaraid na nasyon sa Middle East. Sinaysay ni Department of Migrant Workers (DMW) Secretary Hans Leo Cacdac na dae pa magkakaigwa nin mass repatriation huli ta an mandatory level para digdi iyo an Alert level 4.
Sa ngunyan, maabot sa 80 hasta 100 na OFWs hale sa Dubai an naghahagad na i-repatriate, alagad segun ki Cacdac, imposible pa man giraray ini huli ta sarado na an airspace sa Dubai asin an mga airports huli sa pag-atake kan Iran. Enot nindang tinatawan an mga OFWs nin basic needs arog kan istaran, pagkakan, tubig, asin iba pa mantang nag-aandam para sa saindang evacuation.
Napag-araman na pinalangkaw na kan Overseas Workers Welfare Administration (OWWA) an Alert Level 2 para sa UAE, Bahrain, Qatar, Kuwait, asin Israel, na nagresulta sa deployment ban para sa mga bagong hire na OFWs.
An Lebanon yaon sa Alert Level 3 mantang an Jordan nagtitinir sa Alert Level 1. Mantang mayo pa nin mass repatriation, inabisuhan kan sekretaryo an mga Pilipino sa Middle East na mag-ingat asin mag-ingat sa mga advisories hale sa embahada, one country team leaders, ambassadors on the grounds, consuls general asin importanteng magsunod sa mga protocols kan nasyon kun sain sinda yaon.
Pigsierto ni Cacdac na malinaw an direktiba sainda ni Presidente Ferdinand Marcos na magkaigwa nin mahigot na koordinasyon sa Department of Foreign Affairs (DFA) siring man sa gabos na embahador sa Gulf states asin sa Estado kan Israel siring man sa Middle East.
Igwa man suboot nin mga meeting points o relocation points na nakadesignar para sa lambang nasyon, na igwang nakadestino sa kada lebel kan nasyon.
