Nagluwas nin matibay na pahayag an Department of National Defense (DND) asin Armed Forces of the Philippines (AFP) na naninindugan sa saindang tungkulin komo tagapagdepensar kan Konstitusyon asin man kan sambayanang Pilipino.
Sa tahaw kan mga pangapudan para sa pag-atras kan suporta sa gobyerno huli sa nagkapirang na-iimbwelto sa korapsyon.
Sa statement na pigtintaan ninda Defense Secretary Gilberto Teodoro Jr. asin AFP Chief of Staff General Romeo Brawner Jr., maduong kinondena kan duwa an mga pagporbar na politikal na ilihis an AFP gikan sa saindang mayor na misyon.
Inapod ninda ining “futile” asin “irresponsible,” orog na sa panahong may huma sa katrangkiluhan asin katatagan kan rehiyon.
Sigun sa pahayag, nagtitinir na propesyonal asin non-partisan an AFP asin DND, asin padagos na tumutupad sa saindang mandato sa irarom kan Konstitusyon.
Pigtawan duon man an suporta kan duwang ahensya sa kampanya kontra korapsyon kan Presidente, na inapod nindang sarong “national crusade” para sa marahay na gobyerno asin makatarungang lipunan.
Maduong tinutulan kan DND asin AFP an ano man na pahiwatig kan mga grupong mawot gamiton an AFP sa mga lakdang na magbalgar sa Konstitusyon.
Sigun sa sainda, an AFP an nagsusunod sa Chain of Command asin dae nagtutugot sa mga unilateral na aksyon na mayong basbas kan ley.
Sa pagtatapos kan pahayag, nangapudan an DND asin AFP sa gabos nin Pilipino na magtiwala sa mga demokratikong institusyon, igalang an mga proseso, asin magkasararo sa diwa kan patriotismo.
An tunay na pagbabago an makakamtan sana sa matuninong, legal, asin demokratikong paagi.
