Ipinag-sugo na kan Department of Energy (DOE) sa National Grid Corporation of the Philippines (NGCP), National Electrification Administration (NEA), mga electric cooperative (ECs), asin man private distribution utilities (DUs) an tulos na paghali kan mga campaign materials asin iba pang istrukturang naka ulang sa mga power line sa bilog na nasyon, sarong semana antes man an 2025 National asin Local Elections.
An kasuguan an alinsunod sa Republic Act No. 11361 o Anti-Obstruction of Power Lines Act na obhetong protekhiran an mga pasilidad kan kuryente kontra sa mga nakakasagabal sa linya kan kuryente na pwede na magkawsa nin aksidente magin power interruptions.
Sigun sa DOE, an lakdang an kasimbagan man sa report kan Commission on Election (Comelec) manungod sa mahewasang pagbubugtak nin campaign posters sa mga poste kan kuryente na sigun sa poll body, peligruso asin man ilegal na gibuhon.
Pigtawan duon ni Energy Secretary Raphael Lotilla an importansya kan dagos-dagos asin man salbado na daloy kan kuryente sa panahon nin pirilian.
Pig inkaminar kan DOE an mahigot na pakikipag-koordinar sa mga LGU asin man sa Comelec Task Force Baklas para sa salbado asin marikas na paghahali kan mga naka ulang na powerline.
Nangapudan man sa mga kandidato, partido, asin tagasuporta na sumunod sa mga regulasyon dapit sa tamang pagbubugtak kan campaign materials tangani maasegurar an matuninong na halalan.
