NAGA CITY- Pig-enkaminar kan Department of Health Bicol-Center for Health Development (DOH Bicol CHD) an mga kababaihan na nag-eedad 30 hasta 65-anyos na mag-avail kan libreng screening services para sa cervical cancer.
An nasambitan ng inisyatiba an komo kasimbagan sa pigkundusir na pag-aadal kan taong 2022 kan Global Cancer Observatory-International Agency for Research on Cancer, na nagsasabi na an cervical cancer an pantolo sa pinaka common cancer sa mga kababaihan sa Pilipinas.
Sigun ki Julie Ann Granadino, Regional program manager kan DOH Bicol Cancer Control Program na maski an cervical cancer an pigkokonsederar komo pinakamadaling mabulong na porma kan cancer kun made-detect nin amay alagad sa early stages mayo soboot nin anuman na sintomas na nagreresulta sa huri nang diagnoses asin malala na epekto.
Sa nasambitan man na 2022 na pag-aadal, pigsaysay pa ni Granadino na nagpakol sa 8,549 Filipino na mga kababaihan an na-diagnosed nin cervical cancer sa nasambitan ng taon na nagresulta sa 4,380 na pagkagadan igwa ining average na nagpapakol sa poco mas o menos 12 na fatalities kada aldaw.
Tanganing masimbagan an problema, mas pinahigot pa kan DOH Bicol an cervical cancer prevention initiatives kaini kun saen nagtatangro nin libreng HPV (Human Papillomavirus) vaccination para sa mga kababaihan na nag-eedad 9-anyos hasta 14-anyos siringman nin free cervical cancer screening para sa mga nag-eedad 30-anyos hasta 65-anyos.
Sa ngunyan an mga residente sa Bicol Region padagos na narerekognisar an importansiya kan nasambitan ng lakdang.
