Madeploy an Department of Health (DOH) nin 200 health emergency response team members para sa taunang Traslacion, na piglalaomang pagdagsa kan mananampalatayang Katoliko sa Enero 9.
Mantang an mga ospital sa Metro Manila nakastandby para magreseber nin mga debotong posibleng mangaipuhan nin medical assistance.
Sa sarong entrevista, pigpaliwanag ni Health spokesperson ASec. Albert Domingo na an nasambitan na numero kan mga ipapakuriyat na health emergency responders basado sa tinatayang peak sa deployment para sa taunang prusisyon huli ta pypwede soboot magbago an numero depende sa kinakaipuhan sa operasyon.
Apwera digde, ilalaag liwat sa code white alert an mga ospital alagad paglilinaw ni ASec. Domingo, ini sa Metro Manila sana asin sa mga karatig na rehiyon sa Central Luzon asin Southern Luzon, enkaso may health emergencies katakod sa religious event.
Sa irarom kan code white alert status, mandato sa mga ospital na magin preparado sa pagtugon sa emergencies, sa mga karaniwang problema sa salud na may kinaaraman sa prusisyon siring kan high blood pressure, pagkahilo, posibleng mass casualty.
Katakod kaini, nagpagirumdom an DOH sa publiko partikular na sa mga bados asin igwang helang sa puso o baga na dae na makibali sa Traslacion, orog na kun napupuli sa surusuan asin tulakan.
Pigtawan man abiso an mga deboto na likayan na darahon an mga kaakian.
Alagad sa mga maantendir, nagtao nin nagkapirang tips an DOH, kaibahan an pagdadara kan IDs tanganing madaling matukdo an pagkakabisto, likayan an pagdara kan importanteng gamit sa harong, magdara nin tubig asin maintenance medication kun igwa man, asin hand sanitizers asin magsulot nin komportableng bado.
