Maluwas an Department of Health (DOH) nin bagong guidelines para sa Medical Assistance for Indigent and Financially Incapacitated Patients (MAIFIP) antes matapos an Pebrero, kasunod kan mas mahigot na patakaran na nagbabawal sa paggamit kan guarantee letters gikan sa mga halal na opisyal sa pagbabayad kan hospital bills.
Pigsaysay ni DOH spokesperson Assistant Secretary Albert Domingo na an updated guidelines nakaangkla sa direktiba ni Presidente Ferdinand Marcos Jr., na pigsaley sa irarom kan Section 19 kan 2026 General Appropriations Act (GAA).
Sigun sa DOH, pahehewason kan bagong MAIFIP framework an saklaw kan benepisyo tanganing iiba an ambulatory care, ambulatory surgical clinics, eye centers, ophthalmology asin dental services, free-standing dialysis clinics, asin FDA-approved medicines.
Saro sa pinakaimportanteng pagbabago an 100% coverage kan professional fees kan mga doktor, alinsunod sa DOH guidelines asin makalihis an konsultasyon sa mga pigbibistong medical societies.
Sinaysay man ni Domingo na pigsusuportaran an pinahewas na benepisyo kan mas halangkaw na pondo para sa MAIFIP—gikan P41.16 bilyon kan 2025 naglangkaw ini sa P51.65 bilyon ngunyan na 2026, na maserberng basehan kan mga pigluwas na patakaran.
An Section 19 kan 2026 GAA, na pigpirmahan kan Enero 5, an tahasang nagbabawal sa mga public officials, kandidato, asin saindang mga kinatawan na mangiaram sa pagheheras kan financial assistance, apwera sa mga may direktang administrative asin executive authority sa ahensiyang nagpapautob.
Kan nakalihis na taon, nagpahayag si Caloocan Cardinal Pablo Virgilio “Ambo” David nin mga alalahaning moral asin konstitusyonal sa pagpapahewas kan MAIFIP, pig-abisuhang pupwede ining magpatibay kan political patronage asin makapagpaluya sa dignidad kan tawo.
