Nagluwas an Department of Health (DOH) kasuodma, Marso 9, nin mga bagong paunundon tanganing malikayan asin masimbagan an mga epekto kan matinding init sa salud, alinsunod yan sa kasuguan ni Presidente Ferdinand Marcos Jr.
Sa bagong guidelines, na nakasaysay sa Department Memorandum No. 2025-0114, pigsugo kan DOH an gabos kan mga unit kaini, kaibahan an mga ospital asin health facilities na pinamayuhan kan mga departamento, siring kan “Bagong Urgent Care” asin “Ambulatory Services (BUCAS) centers”, na magpatupad nin strategy kontra sa matinding init.
Pigsugo man an mga inki na makipag-koordinar sa mga lokal na gobyerno sa paagi kan mga programang “PuroKalusugan”, na ipigpabisto kan nakalihis na National Health Sector Meeting.
Kaibahan man sa mga panundon an pagpapasiguro kan kapreparadohan kan mga health facilities asin mga kawani kan gobyerno, pagpapalaganap kan kaaraman sa salud tanganing tukduan an publiko kun pano magin salbado sa matinding init na nae-eksperyensiyahan kan nasyon, asin pagpapatindog nin mga cooling center sa mga air-conditioned o maaliwalas na lugar harani sa mga ruta kan pampublikong transportasyon.
Mantang tatawan nin prayoridad an mga gurang, saradit na aki, bados asin mga tawong igwang kakulangan.
Apwera digde, matindog nin mga hydration station sa gabos kan pasilidad kan DOH, orog na sa pinakamainit na oras kan aldaw puon ala-9 nin aga hasta alas-4 nin hapon, asin ipapautob an pag-detect asin pag-monitot kan mga helang dara kan matinding init.
Mientrastanto, sinaysay man ni DOH Secretary Teodoro Herbosa na preparadong hampangon kan ahensiya an matinding init kan panahon asin pig-abisuhan an mga Pilipino na pirming hilingon an heat index forecast kan PAGASA (Philippine Atmospheric, Geophysical and Astronomical Services Administration)na sakop kan saindang mga lugar.
Nagpagiromdom man ini na pirming magsulot nin maluluwag na bado, puti, asin magian na kasulotan ngunyan na mainit na panahon.
Para sa mga emergency, ag-apod sana sa DOH hotline number sa 911, 1555 o 143 para sa Philippine Red Cross.
An lakdang kan DOH an isinagibo komo pagpreparar para sa piglalaomang mas mainit na aldaw, na obhetong protehiran an salud kan publiko asin siertuhon an kapreparadohan dapit sa paglangkaw kan temperature sa bilog na nasyon.
