Inihayag kan Department of Justice na sainda pang inaantabayanan o pighahalat an iluluwas na desisyon kan korte dapit sa kanselasyon kan pasaporte ni Atty. Harry Roque.
Ini mismo an pigheras ni Justice Assistant Secretary asin Spokesperson Mico Clavano kun saen kinumpirmar kaini na mayo pang hatol an korte sa pigsunad nindang mosyon.
Naghahalat sinda sa sa iluluwas na court order na magsugo sa Department of Foreign Affairs tangani maipakanselar an pasaporteng kapot ni dating Presidential Spokesperson Harry Roque.
Nagpaliwanag an an tagapagtaram kan Department of Justice, na kun saen sinabi kaini an mga pag aagihan na proseso kan pagkanselar sa pasaporte kan sarong indibidwal.
Saiyang pigheras na trabaho soboot kan kagawaran na magsunad nin mosyon sa korte tangani mapawarang bisa sa passport kan mga akusadong na-iimbwelto o may mga kasong kriminal.
Mientrastanto, katakod pa sa isyu kan mga pasaporteng kapot soboot kan abogadong si Harry Roque, nanindugan pa man an Department of Justice na posibleng bako sanang sasaro an pasaporte kan dating presidential spokesperson.
Susog ki Justice Assistant Secretary Mico Clavano na dae ini harayong mangyari orog pa ta nagtutubod sinda na kun bako sana sasaro an valid passport ni Roque, dakula an posibilidad na an iba pa ay iligal kaining nakua.
Hurot kan mga ini na mayo nin ‘inconsistency’ sa pag ultanan kan mga naenot na pahayag ni Justice Secretary Jesus Crispin Remulla asin man Department of Foreign Affiars dapit sa isyu kan mga pasaporteng kapot soboot kan dating tagapagtaram ni Former President Rodrigo Roa Duterte.
Marurumduman na nagsunad nin mosyon an Department of Justice sa korte tangani maipakanselar an pasaporteng inisyu asin man kapot ni Atty. Harry Roque.
Kun saen konektado ini sa mga kasong kriminal na kinakaatubang kan nasambitan ng abogado huli sa pagigin imbwelto soboot sa illegal na operasyon kan Philippine Offshore Gaming Operations sa Porac, Pampanga.
