Na-convict ng Department of Justice (DOJ) ang isang compliance officer ng Philrem Service Corporation dahil sa pagkabigo nitong panatilihin ang kinakailangang records kaugnay ng $81-milyong nakaw sa Bangladesh Central Bank noong 2016.
Ayon sa DOJ, ito ang kauna-unahang kaso sa bansa kung saan nahatulan ang isang compliance officer dahil sa paglabag sa mandatory records keeping ng isang covered institution sa ilalim ng Anti-Money Laundering Act of 2001.
Nakasaad sa batas na kailangang itago ng mga covered institution ang kliyente at transaksyong rekord sa loob ng hindi bababa sa limang taon at agad iulat ang mga kahina-hinala o covered transactions sa Anti-Money Laundering Council (AMLC).
Giit ng DOJ, walang eksepsiyon ang batas kahit pa ang impormasyon ay maaaring makuha mula sa ibang bangko o financial institution, kaya’t malinaw na paglabag ang ginawa ng Philrem sa hindi pagtatago ng customer identification records.
Batay sa imbestigasyon ng Bangko Sentral ng Pilipinas (BSP) noong 2016, ang $81 milyon ay iligal na nailipat mula sa Bangladesh Central Bank patungo sa Rizal Commercial Banking Corporation (RCBC), kung saan $80 milyon nito ay napunta sa account ni William So Go sa ilalim ng Centurytex Trading.
Mula rito, iniulat na ang pera ay inilipat sa Philrem account sa RCBC, at saka ipinasa sa iba pang entidad kabilang ang Bloomberry Resorts and Hotels Inc., Eastern Hawaii Leisure Company, at Wei Kang Xu.
Ayon pa sa DOJ, ang nasentensiyahang opisyal ay isang compliance officer ng Philrem, isang BSP-registered remittance agent, at may pananagutang tiyakin ang pagsunod sa batas laban sa money laundering.
Binigyang-diin ng DOJ na ang pagkabigo ng opisyal na itago ang mga kinakailangang record ay malinaw na paglabag sa batas at nagpatibay sa desisyon ng korte na siya ay managot sa kaso.
