Posibleng ulangan kan Department of Justice an plano ni dismissed Bamban Tarlac Mayor Alice na magsunad nin Certificate of Candidacy para sa liwat kaining pagdalagan sa saindang lugar.
Pigkumpirmar ni Justice Secretary Crispin Remulla an nasambitan na plano tanganing ulangan an liwat na pagdalagan kan dating opisyal sa pagka-Alkalde.
Enot ng pigkumpirmar kan kampo ni Alice Guo sa paagi kan saiyang abogado na si Atty. Stephen David na magsunad an saiyang kliyente nin Certificate of Candidacy sa masunod na semana.
Sigun sa kampo ni Guo, mayo pang pinal na desisyon an korte sa citizenship kan saindang kliyente kaya pwede pa ining magdalagan sa pagka-alkalde.
Mientrastanto, nagtutubod si Remulla na mayo nang karapatan si Alice Guo na maghagad re-election.
Enot nang nadawit an pangaran ni Guo sa illegal na operasyon sa POGO sa saiyang nasasakupan asin pigsasabing ini an ispiya kan China.
Sa ngunyan, padagos man na pigpahimutikan ni Guo an pagkakadawit kaini sa ilegal na operasyon kan POGO asin an pagiging ispiya kan China.
Sigun man sa Commission on Elections, mayo ining kapangyarihan tanganing kanselaron an COC ni Guo partikularmente na dae ini convicted sa saiyang mga kaso.
