Sinimbag kan Department of Labor and Employment (DOLE) an kritisismo ni Ka-Mangagawa Partylist Rep. Eli San Fernando na pinapabayadan kan ahensya an kapakanan kan mga trabahador.
Sa pag-urulay kan House plenary manungod sa budget kan DOLE para sa 2027, hayag na sinabi ni San Fernando na binutasan kan ahensya an Wage Order No. 27 o an dating kasuguan para sa dugang na P85 sa pang-aldawan na sweldo kan mga obrero sa Metro Manila, huli sana sa pag-orolay kan korte.
Binalikan kan lehislador an pagpaluwas kan DOLE kan Wage Order No. 28 na nagmamando para sa P60 na dugang na sweldo, imbes na panindugan kaini an Wage Order No. 27, na segun ki San Fernando, nagpapahiling nin hayagan na pagpabayad sa kapakanan kan mga trabahador na dapat kutang inaataman kan ahensya.
Sinabi ni San Fernando na kun dai kayang panindugan kan DOLE an pigluluwas kaining wage order, mas marhay na dai na tawan an ahensya nin pondo para sa masunod na taon.
Para ki San Fernando, dawa sadit sana an diperensya sa pag-ultanan kan Wage Order No. 27 asin kan Wage Order No. 28, dakulang tabang na ini sa mga trabahador na labi-labing apektado sa padagos na paglangkaw kan presyo kan mga barakalon.
Dai man pinalampas kan budget sponsor kan grupo na si Aurora Representative Rommel Rico T. Angara an kritisismo ni San Fernando.
Segun sa lehilador, bakong totoo na pinapabayadan kan DOLE an kapakanan kan mga Pilipinong trabahador asin sa halip, nirerespeto sana kaini an pag-orolay kan korte.
An P60 sa Wage Order No. 28, segun digdi, pareho sana sa enot na tranche na dapat kuta yaon sa irarom kan Wage Order No. 27.
Alagad sa ibong kan kawaran nin 2nd tranche sa WO 28, nagtutubod an DOLE na an P60 na dugang na minimum wage sarong dakulang bagay na para sa mga obrero sa NCR.
