Tumestigo ang isang engineer ng Department of Public Works and Highways (DPWH) na walang kalakip na construction materials testing report ang ₱92.8 milyong flood control project sa Pandi, Bulacan na kabilang sa malversation case laban kay dating Senador Ramon Bong Revilla Jr. at anim pang akusado.
Sa pagdinig ng Sandiganbayan Third Division ngayong Miyerkules, sinabi ni DPWH Bulacan First District Engineering Office Quality Assurance Section chief Ferdinand Vergara Jr. na dapat tiyakin ng materials engineer at project engineer na may kalakip na test report bago pirmihan ang progress report para sa pagbabayad ng proyekto.
“Wala pong naka-attach na test result. Sa Department Order 11, dapat po may test report,” pahayag ni Vergara bilang tugon sa tanong ni Sandiganbayan Third Division chairperson at Associate Justice Karl Miranda.
Ipinaliwanag ni Vergara na matapos mailabas ang test result, kailangan itong repasuhin ng materials engineer, project engineer, at chief of construction bago aprubahan.
Kinilala niyang sina Engr. Arjay Domasig bilang project engineer at Engr. Emelita Juat bilang materials engineer ng proyekto, na kapwa kabilang sa mga co-accused ni Revilla sa kaso.
Dagdag pa ni Vergara, kulang umano sa due diligence ang pagpapatupad ng proyekto at dapat ay kumpleto muna ang lahat ng requirements bago ito pirmihan.
Kabilang din sa mga co-accused sa kaso sina dating DPWH Assistant District Engineers Brice Hernandez at Jaypee Mendoza, finance section chief Juanito Mendoza, at cashier Christina Pineda.
