Saro sa nahihiling na problema kan Department of Public Works and Highways (DPWH) iyo an kawaran nin koordinasyon sa manlaen-laeng institusyon para sa mga flood control projects na imbis makatabang, mas orog pa na nakaraot asin nakadugang sa problema, ini an sinaysay mismo ni Highways secretary Vince Dizon sa nagpapadagos na konsultasyon.
Kaiba ni Dizon an manlaen-laeng eksperto asin man government agencies sa isinasagibong konsultasyon tangani pag ulayan an flood and water management sa nasyon.
Kabali digde sinda DENR Undersecretary and Water Resource Management Office, Chief, Dr. Carlos Primo David; Project NOAH Executive Director Dr. Mahar Lagmay; asin man an Flood control system expert na si Dr. Guillermo Tabios III.
Sigun pa ki Dizon, kadakol na mga proyekto sa nasyon alagad an problema — imbes na makatabang, nakadagdag pa sa mas malalang problema asin man nagkakawsa pa ini nin peligro huli ta mayo ini nin tamang koordinasyon sa mga nakaka-intindi sa water resource management asin flood control.
Sa closedoor meeting, naghagad si Dizon nin tabang sa mga eksperto asin igwa nin naaaraman sa water resource maangement. Mawot man na maaraman ni Dizon kun ano an gagampanan o dapat na gibuhon kan DPWH tangani masolusyunan an dakulang problema sa baha sa nasyon.
