NAGA CITY- GADAN an sarong driver mantang 5 lugadan kaiba na an sarong aki makalihis mahulog an kotse na piglulunadan kaini sa tulay sa Apad, Ragay, Camarines Sur kasuudma nin pagkaudto, Mayo 12, 2024.
Sa entrevista kan Bombo Radyo Naga ki Neopito Tipay Jr., MDRRMO Officer, pigsaysay kaini na saro sa rason kan insidente an dae soboot nariparo kan driver an mga signages sa gilid kan tinampo dapit sa tulay na sarong makitid. Apwera pa digdi, pakurbada man an tulay na posibleng nagresulta tanganing mag-overshoot an behikulo.
Basado man sa report kan mga otoridad, nawaran nin kontrol an driver sa pagmamaneho na nagresulta sa pagkarata kaini sa tulay na nasa haros 4 metro an langkaw. Apwera pa digdi, maski soboot hababaw an tubig, nagbaliktad an behikulong saindang piglulunadan.
Sigun pa ki Tipay, igwa man nin mga concerned citizen an nasa lugar na nagtabang tanganing maihaon tulos an mga pasahero apwera sa driver na nahaluyan antes makua. Kan makaluwas man, pigporbaran ining i-revive alagad sa kasamaang palad, pigdeklarar man sana ining dead on arrival kan doktor pag-abot sa ospital kaibanan man an mga pasahero na nagsapo man nin mga injuries.
Mientrastanto, gikan soboot an magkakaparientes sa Cavite asin mapasiring kuta sa Masbate City.
Dugang pa ni Tipay, mayo man sa impluwensya nin arak an driver, alagad posible soboot na huli sa pagbago kan weather condition, asin huli sa pagal kun kaya naapektaran an driving decision kaini.
Katakod kaini, ini naman an panduwang beses na nairehistro an siring na insidente sa nasambitan ng tulay.
