Malunsar an Department of Social Welfare and Development (DSWD) nin sarong bagong online system na magpapadali asin magpaparekas sa proseso kan pag-aaplay nin travel clearance para sa mga minors na mawot magpasiring sa ibang nasyon.
Sa sarong pulong balitaan kan kasuodma, Huwebes, Pebrero 13, ipighayag ni Cheryl Mainar, Social Welfare Officer IV kan Program Management Bureau (PMB) kan DSWD, na an inisyatibang ini an obhetong gibuhon na mas marekas asin mas accessible an proseso para sa mga Pilipino.
Kun saen dae na kinakaipuhan pa soboot magpasiring sa mga opisina kan DSWD an mga aplikante tanganing magsumiter kan mga dokumento.
Sigun sa ahensiya an travel clearance an kinakaipuhan para sa mga minors na mayo pang 18-anyos na mapasiring sa ibang nasyon nin solo o kaibahan an ibang tawo apwera sa saindang mga magurang o legal guardian.
Pigsierto kan ahensiya na an clearance na kukuahon an igwang pagtugot kan mga magurang o legal guardian kaini.
Pigtawan-duon ni Mainaer na sa paagi kan bagong sistema, an proseso kan pag-aaplay soboot an magigin mas marekas.
Mientrastanto an mga kumpletong aplikasyon na na-verify an lalaoman na matatapos sa laog kan saro hasta tolong aldaw, asin kadakol sa mga aplikante an makakaresebir kan saindang clearance sa parehong aldaw.
Kaibahan man sa matatawan nin travel clearance an mga minors na mabakasyon nin solo, mga kaibahan kaining prospective adoptive parents, o kaibahan an iba pang mga tawo apwera sa saindang mga magurang o legal guardian apwera digde kaibahan pa an mga biological parents kun sinda an illegitimate, o mga minors na mayo pang 13-anyos na mawot magluwas nin nasyon, kaibahan an mga tugang o kaparientes na labi sa 15-anyos.
Siring man, exempted man sa pagkua nin clearance an mga minors na kaibahan an parehas na mga magurang kaini (kun sinda an legitimate na aki) asin an illegitimate minor na kaibahan an ina o legal guardian kaini.
