NAGA CITY- Klinaro ngonian ni Department of Social Welfare and Development (DSWD) Bicol director Arnel Garcia na solamenteng an saindang ahensya an nag-validate kan mga nasa listahan kan totally asin partially damaged na harong huli sa panlalamasa kan bagyong Nina kan 2016.
Ini enkoneksyon sa reklamo kan nagkapirang mga residente na suboot dae nakabale sa mga nakaresibe nin Emergency Assistance Shelter (ESA) na pigtatao kan DSWD national office.
Segun ki Garcia, kun an sarong persona dae nakabale sa listahan, posibleng bako man talaga totally damaged an harong kaini.
Pwede man suboot na kabale ini sa 2nd batch na pwedeng makaresibe sa masunod na pagpaluwas kan ESA mantang an iba naman nagkakaigwa suboot nin problema huli sa pabago-bagong pangaran.
Sa ibong kaini, pigsierto ni Garcia na makakaresibe an mga benipisyaryo kan ESA basta nakalaog sa ginibong evaluation asin pagbe-beripikar kan ahensya.
