NAGA CITY- Nagpakol sa nasa P7.86-M an nabilog na sales kan DTI-Camarines Sur sa nakalihis na Feria de Camarines featuring Muebles.
Sa entrevista kan Bombo Radyo Naga ki Jay Percival Ablan, Provincial Director kan DTI-Camarines Sur, sinaysay kaini na sa 27 na exhibitors an mga furniture makers an nakapagkontribwer nin dakulang kita sa nasambitan ng aktibidad.
Katakod kaini, dakula an pasasalamat kan opisyal sa mga local consumer orog na an gikan sa probinsiya nin Camarines Sur para sa saindang dakulang pag-aprisyar asin suporta sa mga produkto na gibo kan mga Micro, Small, and Medium Enterprises.
Sigun ki Ablan an trayumpo na ini an huli sa kolaborasyon kan DTI, mga MSMEs asin mga publiko na preparadong magtao kan saindang oras tanganing makatabang sa mga entrepreneur.
Dugang pa kan opisyal, na-higlight man sa kakatapos pa sana na Feria de Camarines an magagayon na produkto na pwedeng ipanglaban bako sana sa local kundi magin International.
Ini soboot an kagayunan kan kooperasyon asin pagtatarabangan nagigin mas pusog an lakdang pasiring sa trayumpo na minamawot kan lambang saro.
Sa ngunyan, padagos an pag-enkaminar ni Ablan sa publiko na padagos na suportaran an mga masunod na aktibidad na saindang ikukudusir sa mga masunod na bulan.
