Pigpahayag kan Department of Trade and Industry Camarines Sur na nagkaigwa nin price adjusment kan mga barakalon puon pa kan nakalihis na Disyembre 2024.
Sa entrevista kan Bombo Radyo Naga ki Jay Ablan- Provincial Director kan DTI-Camarines Sur, sinaysay kaini na sa haros labing 180 na produktong pigmomonitor kan saindang opisina na mga basic and prime commodities, nagpakol sa 60% an mantinido an presyo, 20% an naglangkaw mantang an natatada man na porsyento an nagbaba.
Sigun sa opisyal, an paghiro na ini sa presyuhan an huli sa paglangkaw kan labor fee o an aldawan na sweldo kan mga obrero na igwang epekto sa presyuhan kan mga barakalon.
Apwera digde, pabago-bago man soboot an ribayan kan dollar kontra peso na saro sa mga factors sa pagbabago man sa presyuhan kan prime asin basic commodities.
Siringman, nagkaigwa nin paglangkaw sa mga canned products o naggagamit nin mga de lata siring kan sardinas, corned beef magin an dairy products na dependent man an Pilipinas gikan sa ibang nasyon.
Katakod kaini, an nasambitan ng price adjustment an magseserbeng SRP sa mga produkto na mababakal sa mga merkado nin huli ta ini naman soboot an napag-ulayan kaibahan an mga retailers o manufactures.
Sa ngunyan, pigsierto na sana ni Ablan na padagos an saindang piggigibong pagbabantay sa mga presyuhan kan mga barakalon tanganing dae man malugi an lado kan mga manufactures asin consumers.
