Liwat makikipagtabangan an Philippine Red Cross Camarines Sur Chapter sa Bombo Radyo Naga na makondusir nin Blood Letting Activity sa irarom kan Dugong Bombo 2026 sa Nobyembre 14, 2026 sa LCC-CBD2 2nd Floor Event Center.
Sa intrevista kan Bombo Radyo Naga kay Maria Felisa Badiola, Chapter Administrator kan Philippine Red Cross Camarines Sur Chapter, preparado na an saindang staff asin volunteers sa piglalaoman na pagdagsa kan mga blood donors. Kabali sa mga nagtatabang sa nasabing aktibidad iyo an mga doktor, medical technologists asin nurses na iyo an magsasagibo nin screening asin iba pang kinakaipuhan na proseso antes an pagdonar nin dugo.
Obheto kan aktibidad na makakolekta nin labi sa 100 na blood donors para makatabang sa pangangaipo nin dugo sa Camarines Sur asin iba pang lugar na nangangaipo kaini. Tinawan doon ni Badiola na importante an pagdonar nin dugo huli ta nakakatabang ini sa pagsalbar nin dakul na buhay.
Pig-eenkaminar an mga gustong magdonar na siguraduhon na nasa marhay na kamugtakan an saindang hawak, magkaigwa nin bastanteng turog asin likayan an pag-inom nin alak antes magdonar nin dugo. An mga may edad 16 pataas sinasabing kwalipikado na magdonar, alagad kinakaipuhan an pagtugot kan magurang para sa mga menor de edad, mantang an eligibility kan lambang donor sakop pa man giraray kan health screening.
Pig-engganyar ni Badiola an publiko, partikularmente an mga first-time donors, na makisumaro sa Dugong Bombo 2026 asin magin parte sa pagtabang sa mga pasyenteng nangangaipo nin dugo.
Mientrastanto, sarabay na ikukundisir sa 25 key areas sa manlaen-laeng parte kan nasyon an bloodletting activity.
Segun ki Bombo Maylen Binalay-Chairman, Dugong Bombo 2026, gaganapon an Dugong Bombo 2026 sa Nobyembre 14, 2026, Sabado. Kun saen masairarom sa health screening an mga donor bago an blood donation.
Katuyuhan kan taunang programa na makatabang sa pagmamantenir nin sapat na suplay kan dugo sa mga blood bank sa bilog na nasyon, mantang tinatawan nin pagkakataon an publiko na makapagsalbar nin buhay sa paagi kan boluntaryong pagdo-donate nin dugo.
Tig-eenkaminar man an mga indibidwal, pamilya, organisasyon asin iba pang grupo na mag-atendir asin magparehistro sa pinakaharani na istasyon kan Bombo Radio o Star FM.
