Piglalaoman na masumpa liwat an duwang kagawad sa Brgy. San Francisco sa syudad nin Naga makalihis an labi sarong taon.
Sa nagin entrevista kan Bombo Radyo Naga ki Kapitan Efren Nepomuceno, kapitan kan Brgy. San Francisco Naga City, pigsaysay kaini na nagpasiring an mga personahe kan sa Comelec saindang barangay tanganing maresolbahan an memo o kasuratan na pigdeklarar na an matukaw iyo an duwang kagawad na soboot iyo an nanggana kan nakalihis eleksyon sa barangay.
Basado kaya sa pag review kan resulta an nasambitan ng mga kagawad an pigdeklarar kan Comelec na matukaw sa posisyon.
Sa presente, naoogma man si Nepomuceno huli ta makakabalik na an nasambitan ng kagawad huli ta dati man soboot kaini nakaibahan an duwa.
Sigun pa sa opisyal, itatao man giraray kaini an dating komitiba huli ta kabisado naman kan duwang kagawad an siring na trabaho sa haloy na panahon na saindang pagserbisyo.
Nagpasalamat man si Nepomucino huli ta an sainda soboot kahaditan asin kapagalan an natawan kalinawan asin naresolbahan man giraray na sa ngunyan an mga ini an pigtalaga kan Comelec na mag tukaw komo elected barangay kagawad.
Piglinaw man kan Kapitan pig abot labi sarong taon antes maresolbahan huli sa nagin problema sa mga board of canvasser kun sain nagkaigwa nin tally asin ngunian pa sana naitama an siring na sala kan nakalihis na barangay election.
Katakod dgdi, aram man soboot kan duwang naenot na nagtukaw na nagkaigwa nin sala kan nakalihis na eleksyon kaya preparado man soboot ini na atubangon kun ano an magigin aksyon kan Comelec sa nagin resulta kan 2023 elesyon.
Dugang pa ni Nepomuceno, masumpa man giraray ki Atty Maico Julia o ki Mayor Legacion an duwang kagawad na naggana tanganganing pormal na ining makatukaw komo mga elected barangay opisyal o kagawad kan siring na barangay.
Piglalaoman man kaini na liwat magtarabangan asin magtrabaho para sa ikakarahay kan saindang mga konstituentes.
Sa ngunyan, nakaulay naman soboot ni Nepomuceno an saro sa nasambitan ng kagawad asin pighagad man kaini saiya na itao liwat digde an dating pigkaputan na komitiba an Health asin Beautification kan barangay.
Mientrastanto, kampante man soboot si Nepomuceno sa nasambitan ng kagawad huli ta nakatuwang na ini dati sa pagmanehar kan barangay.
Sa ngunyan, pagirumdom na sana ni Kapitan Nepomuceno na orop pang ipahiling sa konstituentes kan saindang barangay partikularmente sa mga nagboto sainda na dae an mga napasala sa saindang mga piniling opisyal.
