NAGA CITY – Liwat na nagpagirumdom an pamayuhan kan LTO-Naga na dae pigtutugutan an mga e-bikes na mag-agi sa mga primary road sa siyudad nin Naga.
Sigun ki Grace Rojas, Chief kan LTO-Naga, na sa presente saindang pang pighahalat an guidelines kun pano i-stamp an mga identity kan mga e-bikes nin huli ta ngunyan igwa soboot nin duwang klase kan e-bikes sa siyudad – an bago na maluwas soboot na igwa nin unique identity asin an in use o an mga dati nang mga ginagamit na iyo man an dapat iparehistro sa LTO.
Dugang pa ni Rojas, kan Hulyo 2 mapuon na kuta an pagdadakop kan mga unregistered e-bikes sa siyudad alagad na extend ini huli naman ta pigtao ini sa saindang opisina halipot na aldaw na sana antes ini ipautob.
Huli, pig-required an mga maysadiri kan nasambitan ng behikulo na magparehistro antes mag-abot an bulan nin Disyembre.
Mientrastanto, mahigot man na ipinagbabawal an pag-aagi kan mga e-bikes sa primay road.
Alagad enkaso dae malikaya, pupwede sana ining mag-agi sa outer lane.
Apwera pa digdi, sulamenteng mga taga siyudad sana an pupwedeng mag-agi asin dae na man pupwede digdi an gikan sa luwas kan siyudad nin huli ta an nasambitan ng behikulo an para sana man sa short trip.
