Suportado kan alkalde kan banwaan nin San Jose Partido Camarines Sur an paggamit nin Electric vehicle orog na ngunian na padagos an paglangkaw kan presyo kan produktong petrolyo.
Sa interevista kan Bombo Radyo Naga ki Mayor Jerold B. Peña, an alkalde kan banwaan ni San Jose, kan nakalihis pang taon antes pa man magkaigwa ni kariribukan sa middle east, nakapag order na an alkalde nin full electric ambulances asin pinaglalaoman na sa masunod na taon, magkakaigwa na nin mga behikulong kuryente an nagpapadalagan asin bakong produktong petrolyo.
Sigon sa alkalde, ngunian na taon igwang duwang patrol an nasa proseso na kan pagbakal na kun sain nakatagama ini sa hepatura kan PNP asin Eco -patrol kan saindang banwaan.
Dagdag pa kan opisyal na ini saiyang napagdesisyunan huli ta base sa trend kan presenteng kamugtakan kan kinaban, pataas na nin pataas an kantidad kan produktong petrolyo.
Baku sanang LGU an nagsasapo kan problema kan halangkaw na presyo kan fuel kundi maging an highly Urbanized Cities na saro sa pinagtatagamahan kan saindang budget iyo an fuel cost huli sa mga serbisyong itinatao kan LGU primero na an ambulansya, garbage truck, pantolo an mga patrol vehicles asin iba pang mga behikulong ginagamit kan lambang LGUs.
Magigirumduman na nasa 3rd class Municipality an banwaan nin San Jose kun kaya sigon sa alkalde, minamaximize an saindang kadikit na pondo alagad sa paagi kan E-vehicle, dakula an matitipid kan LGU san Jose kasabay kan pagserbi makakatipid pa an LGU sa fuel cost.
An San Jose an pinakaenot na mabubugtakan nin public charging station sa saindang Tourist Rest Area sa Brgy. Dulo Talisay Port kan AC Mobility sa pakikipagtabangan kan BYD Philippines, Ayala Corporation asin kan Department of Tourism.
